Na Xunta Directiva Provincial do PP de Ourense, o líder dos populares galegos enxalza o apoio dos votantes nas urnas ao Partido Popular, aínda que chama a “intensificar” esforzos e “non dar todo por perdido e, menos, todo por gañado”
Destaca tamén a transformación da comunidade, “unha rexión que xa ten a entidade suficiente para ir a China a presentarse como un territorio atractivo para investir”
Luis Menor puxo en valor o traballo do PP ourensán, que está a fortalecer a súa implantación no territorio actualizando as agrupacións locais coa convocatoria de tres novos congresos en xuño, o que elevará a oito os conclaves celebrados nestes catro meses
28, abril, 2026
O presidente do PPdeG, Alfonso Rueda, reivindica o ADN do “partido do sentidiño e da estabilidade”, que é “o que máis se parece aos galegos e aos ourensáns”. Así o manifestou durante a Xunta Directiva Provincial do PP de Ourense, no marco da rolda de reunións que se realizaron xa nas provincias de A Coruña, Pontevedra e Lugo, co obxectivo de “ter sempre engraxada a máquina” de gañar eleccións, como volveu definir ao Partido Popular o presidente autonómico.
Precisamente, referiuse ao ciclo electoral “intenso” que se vive en España (Estremadura, Aragón, Castela e León e agora Andalucía no mes de maio) e puxo o foco nas convocatorias que máis afectarán a Galicia: as municipais de 2027 e as xerais, “que serán cando a Sánchez lle conveña”, dixo.
Nun chamamento a intensificar o traballo “nos barrios e nos pobos”, fixo fincapé en que as eleccións “se gañan dende xa”, enxalzando esa labor diaria dende concellos, deputacións, Xunta de Galicia, Congreso ou Senado. Neste sentido, lembrou a tendencia de que o Partido Popular está sendo a opción maioritaria nas eleccións que xa se celebraron, proba de que os populares “escoitan” e “atenden” á cidadanía nas diferentes Cámaras e a veciñanza responde co seu voto nas urnas. Con todo, instou á militancia a “non dar todo por perdido, e menos nada por gañado”. Así o sinalou nunha xunta directiva na que tamén participaron o presidente provincial do PP de Ourense, Luis Menor, e a secretaria xeral do PPdeG, Paula Prado.
A Galicia en positivo, a Galicia da transformación
Nesa receita do éxito do PPdeG nas urnas, Rueda apostou por continuar cos valores de “estabilidade” e “moderación” e puxo como exemplo o Goberno Galego como un goberno “que cumpre”, citando fitos como a educación gratuíta desde a escola infantil ata a universidade; o esforzo histórico en vivenda, co anuncio recente de máis medidas para facilitar o acceso das clases medias; a sanidade pioneira, co centro de protonterapia e o proxecto de reforma da atención primaria, ou a busca de oportunidades para que Galicia siga medrando, como se fixo a pasada semana cunha viaxe institucional a China.
Sobre esta viaxe de traballo, o líder dos populares galegos afondou en que a visita “exemplifica que Galicia, unha rexión periférica, xa ten a entidade suficiente para ir a China, unha potencia mundial, a presentarse como un territorio atractivo para investir”. Así, remarcou que a transformación da comunidade autónoma nos últimos tempos é algo “a poñer en valor”, xa que a única forma de xerar riqueza, emprego e benestar é atraendo investimentos e industrias á nosa terra”.
En contraposición ao Goberno autonómico da “Galicia en positivo”, citou ao Goberno de Sánchez, que “non ten tempo nin para gobernar, nin para ocuparse dos problemas dos cidadáns, nin dos ourensáns”, cun PSdeG que “só cumpre ditados de Ferraz” e “pouco lle importa Galicia”. Aos socialistas súmase o seu socio do BNG, que “pensa que ser oposición é o mesmo que opoñerse a todo”.
Luis Menor anuncia tres novos congresos locais en xuño
Pola súa banda, o presidente do PP da provincia de Ourense, Luis Menor, repasou a actividade desenvolvida polo PPdeOU nestes catro meses de 2026 e que cualificou como “intensísimos”, coa celebración de cinco congresos locais, a creación de tres novas xestoras, incluída a de Novas Xeracións de Verín, e a constitución da primeira agrupación moza na Limia.
Na Xunta Directiva aprobáronse ademais tres novos congresos locais para o mes de xuño -Esgos, Manzaneda e Viana do Bolo-, mantendo así como principal desafío “a consolidación territorial do partido, actualizando e fortalecendo cada agrupación da provincia”.
Tamén se referiu á celebración da II Interparlamentaria ourensá e á creación do grupo Séniors en Acción, integrado por maiores que reivindican a súa capacidade para xogar un papel activo na política, ademais da organización, o próximo 9 de maio, da primeira romaría provincial do PP de Ourense, “coa que queremos transmitir esa imaxe de fortaleza e unión que nos caracteriza”.
Toda esta actividade, subliñou Luis Menor, está encamiñada a manter a maquinaria do partido “a pleno rendemento”, único xeito de mostrar ante a sociedade que “o noso compromiso con Ourense non ten meta”.
Ademais dos obxectivos políticos, como superar as 54 alcaldías actuais, recuperar a maioría absoluta na Deputación e ser decisivos na capital, o presidente provincial defendeu que o PP de Ourense lidera “a bandeira da reivindicación pola nosa implantación no territorio e o coñecemento profundo das necesidades da nosa veciñanza, con presenza constante en cada aldea e cada barrio, grazas a eses 473 concelleiros que temos por toda a provincia, o 55 % de todos os concelleiros”.
