O proxecto de mellora, valorado en máis de 65.000 euros, perdeu unha oportunidade real de financiamento autonómico pola falta de resposta aos requirimentos da administración, sinalan os populares
6, outubro, 2026
O PP de Maceda e Montederramo pide explicacións aos gobernos locais de ambos municipios pola perda dunha axuda autonómica de 50.000 euros para o arranxo do camiño Verducedo-Santiso. Así o avanzaron José Manuel Gil e Eloy González, representantes populares en Maceda, e Manuel Rodríguez, de Montederramo, nunha visita á zona na que estiveron acompañados polos parlamentarios galegos Juan Casares e Víctor Baladrón.
Lamentaron que ambos os concellos quedasen fóra da convocatoria de axudas da Xunta de Galicia á que concorreran de xeito conxunto para financiar a mellora do camiño Verducedo-Santiso. O proxecto, que tiña un orzamento total valorado en 65.287,70 euros, optaba a unha achega autonómica que podía acadar o límite máximo de 50.000 euros.
Segundo recolle a resolución publicada no Diario Oficial de Galicia, o expediente correspondente a esta solicitude foi tido por desistido. O motivo desta exclusión atópase en que os gobernos locais non atenderon, dentro do prazo legalmente establecido, o requirimento realizado pola administración autonómica para emendar ou completar a documentación que presentaran inicialmente.
Esta falta de dilixencia supón que a actuación nin sequera chegou á fase de avaliación ou concesión da axuda. Deste xeito, ambos os municipios quedaron sen ningunha opción a obter os fondos nesta convocatoria, o que obrigará a asumir o custo íntegro do camiño con fondos propios se se quere executar ou, pola contra, a deixar aos veciños sen esta necesaria mellora.
Oportunidade perdida pola xestión municipal
Cómpre lembrar que o 80 % do orzamento presentado para a obra ascendía a 52.230,16 euros. Ao tratarse dunha solicitude compartida por dúas entidades locais, o proxecto axustábase perfectamente para optar ao tope máximo de 50.000 euros previsto nas bases da Xunta para incentivar a cooperación intermunicipal.
Ante esta situación, os populares consideran urxente e necesario que os alcaldes expliquen con total claridade e transparencia que ocorreu exactamente durante a tramitación administrativa do expediente. “Non estamos a falar dunha subvención que xa estivese concedida, pero si dun proxecto formalmente presentado e dunha oportunidade real e viable de financiamento que se truncou unicamente por non responder en prazo á emenda de documentos”, subliñan desde o PP, esixindo responsabilidades para que non se volvan repetir estes descoidos que prexudican directamente ás infraestruturas do rural.
