A xornada “Construíndo Galicia desde Ourense”, no que se puxo o foco na vivenda como un dos principais retos sociais do presente e do futuro, contou coa presenza da conselleira de Vivenda, Planificación de Infraestruturas, María Martínez Allegue
“Fronte ás trabas e á falta de políticas eficaces do Goberno de España, a Xunta está do lado das persoas, buscando solucións reais para que todos poidan acceder a unha vivenda”, destacou a presidenta da Xestora Local do PP de Ourense, Ana Méndez
Tamén lamentou a popular que non exista ningunha medida municipal impulsada polo Goberno local en materia de vivenda. “Mentres outras cidades galegas desenvolven políticas municipais propias de apoio á vivenda, como bolsas de alugueiro, incentivos fiscais ou plans de rehabilitación urbana, en Ourense o alcalde non impulsou nin unha soa medida”, criticou
“Na cidade de Ourense non temos solo para construir vivenda, por iso estamos a desenvolver un ámbito no barrio do Vienteún, a través dun proxecto de interés autonómico, para a construcción de máis de 1600 vivendas, das cales o 80% serán vivendas protexidas con carácter permanente”, explicou a conselleira de Vivenda, Planificación de Infraestruturas, María Martínez Allegue
28, xaneiro, 2026
O Partido Popular da cidade de Ourense celebrou esta tarde no Centro Cultural Marcos Valcárcel a xornada “Construíndo Galicia desde Ourense”. Un acto que contou coa presenza da conselleira de Vivenda, Planificación de Infraestruturas, María Martínez Allegue, e no que se puxo o foco na vivenda como un dos principais retos sociais do presente e do futuro.
A presidenta da Xestora Local do PP de Ourense, Ana Méndez, fixo fincapé en que a vivenda é hoxe unha das maiores preocupacións da cidadanía. “Sabemos o difícil que é acceder a un piso, a un alugueiro ou a unha primeira vivenda, e por iso para o Partido Popular este é un tema absolutamente prioritario”, subliñou.
Neste senso, a popular destacou o papel da Xunta de Galicia, sinalando que “fronte ás trabas e á falta de políticas eficaces do Goberno de España, a Xunta está do lado das persoas, buscando solucións reais para que todos poidan acceder a unha vivenda”. Ana Méndez tamén lamentou que non exista ningunha medida municipal impulsada polo Goberno local en materia de vivenda. “Mentres outras cidades galegas desenvolven políticas municipais propias de apoio á vivenda —como bolsas de alugueiro, incentivos fiscais ou plans de rehabilitación urbana—, en Ourense o alcalde non impulsou nin unha soa medida”, criticou.
A presidenta da Xestora Local salientou a importancia de contar coa presenza da conselleira de Vivenda, Planificación de Infraestruturas, María Martínez Allegue, a quen agradeceu a súa asistencia: “Hoxe temos a sorte de contar coa conselleira para explicar todas as axudas, programas e investimentos que a Xunta está a poñer en marcha, e tamén o importante compromiso que existe con Ourense en materia de vivenda”.
Durante o acto puxéronse en valor proxectos clave impulsados pola Xunta na cidade, como as 64 vivendas de promoción pública en Mariñamansa, que se rematarán este ano e o desenvolvemento residencial de Escorial-Vinteún. “Na cidade de Ourense non temos solo para construir vivenda, por iso estamos a desenvolver un ámbito no barrio do Vienteún, a través dun proxecto de interés autonómico, para a construcción de máis de 1600 vivendas, das cales o 80% serán vivendas protexidas con carácter permanente”, explicou a conselleira, Martínez Allegue.
Tamén se destacou o novo programa da Xunta para a adquisición de baixos comerciais e a súa transformación en vivendas, unha medida innovadora que permitirá aumentar a oferta residencial e revitalizar zonas urbanas. “Esta oferta pública de adquisición en Ourense é un paso máis para incrementar o número de vivendas públicas na cidade, ao converter os locais en desuso en inmobles para uso residencial”, subliñou Martínez Allegue.
“Hoxe falamos de feitos reais, de promesas cumpridas. A Xunta está a investir, a planificar e a executar, demostrando con proxectos concretos que a vivenda é unha prioridade”, afirmou Ana Méndez, quen engadiu que “Ourense non pode quedar atrás e por iso é tan importante este compromiso do Goberno galego coa nosa cidade”.
O acto concluíu cun chamamento á participación e ao diálogo, animando ás persoas asistentes a trasladar as súas dúbidas e necesidades. “Queremos escoitarvos, tomar nota e seguir traballando para construír un Ourense con máis oportunidades e cun acceso á vivenda máis xusto e realista”, concluíu a presidenta da Xestora Local, Ana Méndez.
