Elixida no congreso celebrado pola agrupación local, onde Luis Menor destacou a figura da presidenta como “persoa de referencia do partido no territorio”
25, maio, 2025
Melisa Macía Domínguez (Vilariño de Conso, 1990) foi elixida presidenta da agrupación do PP de Vilariño de Conso no congreso local celebrado nesta localidade e que foi clausurado polo presidente provincial, Luis Menor, quen destacou a notable traxectoria política da que foi no seu momento -en 2017 con 29 anos- unhas das alcaldesas máis novas da provincia e unha das máis mozas de España.
As gañas de traballar polo seu concello, xunto coa forza que imprime a mocidade, lembrou Luis Menor, levárona a encabezar en 2019 a candidatura do PP obtendo a maioría absoluta, que revalidaría no actual mandato. Agora, engadiu o presidente provincial, Melisa Macía reforza a súa figura como “persoa de referencia do partido no territorio, e o seu cometido será axudar a fomentar a participación, garantir a cohesión e involucrar a afiliados e simpatizantes no proxecto popular”.
Pola súa banda, a nova presidenta da agrupación local de Vilariño de Conso puxo énfase no “importante paso que supón este congreso para organizar o partido”, sinalando que entre os seus primeiros desafíos figura involucrar a persoas simpatizantes, “escoitando a todo o mundo, sexan ou non do PP, que é a base de todo traballo político”.
