No congreso celebrado esta tarde, o presidente provincial pediulle ao novo presidente local que contribúa “a facer fronte aos desafíos que temos por diante”, achegando unha visión clara das prioridades e necesidades tanto do municipio como da provincia
Tras relevar a Plácido Álvarez á fronte dos populares locais, León púxose deberes, asegurando ser consciente de que a presidencia local do PP esixirá “moita dedicación, escoita e capacidade de diálogo”, co obxectivo de que o Partido Popular de Muíños siga sendo referencia de estabilidade e compromiso
18, abril, 2026
Israel León Rodríguez foi elixido esta tarde novo presidente do Partido Popular de Muíños, no congreso celebrado pola agrupación local e no que o presidente provincial popular, Luis Menor, destacou a súa ““experiencia, compromiso e vocación de servizo público”.
Con este congreso, dixo o presidente provincial, “reafirmamos o compromiso do Partido Popular con Muíños e facémolo dando paso a unha persoa que leva desde mozo o servizo público no seu ADN”, en referencia a Israel León, do que destacou o seu “forte apego aos seus e á súa terra”. Menor pediulle que contribúa “a facer fronte aos desafíos que temos por diante”, achegando unha visión clara das prioridades e necesidades tanto do municipio como da provincia.
Non faltaron palabras de recoñecemento para o anterior presidente local, Plácido Álvarez, “referente na política local e provincial”, de quen puxo en valor a súa “dedicación e esforzo á hora de facer política”. Subliñou que tanto Israel como Plácido “son hoxe o exemplo máis claro do relevo natural, ordenado e tranquilo que caracteriza ao PP”.
Estes congresos, dixo Luis Menor, permiten ter “un partido actualizado, unido, forte e no que poida confiar a cidadanía”, premisas básicas ante os importantes retos de 2027, onde os obxectivos son superar as 54 alcaldías actuais, recuperar a maioría absoluta na Deputación e ser decisivos na capital da provincia, ademais de contribuír á segunda maioría absoluta de Alfonso Rueda e “levar á Alberto Núñez Feijóo á Moncloa”.
Israel León anunciou, pola súa banda, que Plácido Álvarez será o presifiente de honra do PP de Muíños, que afronta esta nova etapa “como un reto maiúsculo, con ilusión e moitas gañas de traballar”, subliñando que fomentará a “unidade, apertura a novas ideas e unha actitude construtiva”.
Agradecido a Plácido Álvarez de que “confiase en min desde moi novo para aprender ao seu carón”, engadiu que a súa prioridade será que cada membro do equipo do PP de Muíños “aporte, sume e represente os valores de proximidade, responsabilidade e servizo, que son os que queremos transmitir”.
León púxose deberes, asegurando ser consciente de que a presidencia local do PP esixirá “moita dedicación, escoita e capacidade de diálogo”, co obxectivo de que o Partido Popular de Muíños siga sendo referencia de estabilidade e compromiso: “Estou preparado para elo”.
O congreso de Muíños pon fin á primeira quenda de convocatorias locais de 2026, logo dos conclaves celebrados en Larouco, Xunqueira de Espadanedo, Lobios e Lobeira.
