Ourense, 08 de marzo de 2014.- A escultura da Leiteira, na rúa do Paseo, acolleu o acto conmemorativo organizado pola Comisión de Igualdade do PPOU con motivo do Día Internacional da Muller, que este ano se adica ao emprendimento. Procedeuse á lectura de textos de diversas escritoras, así como do manifesto do PP de Galicia, que aquí reproducimos:

 O Partido Popular de Galicia quere aproveitar a simboloxía do 8 de marzo, Día Internacional da Muller, para reiterar o seu firme compromiso coa igualdade de condicións entre homes e mulleres en tódolos ámbitos da vida diaria. Un compromiso que non se reduce a determinadas datas sinaladas, senón que está latente os 365 días do ano.

  O xénero dunha persoa non debe ser, baixo ningún concepto, un motivo de discriminación e, neste senso, consideramos que non hai peor desigualdade que a que vén determinada pola natureza.

  Ao longo da historia, a muller foi abrindo camiños e acumulando conquistas para vencer a lacra da discriminación sexual a nivel social e laboral, pero aínda quedan moitas batallas por librar para acadar unha igualdade real.

  En pleno século XXI aínda persisten no tempo certos prexuízos que non fan senón impedir o avance cara unha sociedade igualitaria e xusta, na que por encima do xénero dunha persoa estea o esforzo, o talento e o traballo persoal sen prexuízo do xénero.

  Ademais, a día de hoxe seguen existindo obstáculos para que se poida conciliar unha vida profesional plena coa vida familiar, e isto é algo que afecta especialmente ás mulleres, que por outra banda sofren máis que ninguén as consecuencias do desemprego. Así mesmo, a igualdade salarial entre homes e mulleres aínda é un obxectivo a conseguir. O traballo das mulleres debe ser igual de valorado, en tódolos aspectos, que o que desempeña un home. A traballos iguais, salarios iguais.

  Desde o Partido Popular de Galicia, queremos afianzar o noso compromiso para loitar contra todo aquilo que se interpoña na consecución da igualdade de oportunidades e de condicións entre homes e mulleres. Queremos contribuír a unha sociedade máis tolerante, máis democrática e na que homes e mulleres compartan responsabilidades por igual.

  Somos un partido onde as mulleres teñen un peso importante e no que o seu papel sempre foi tratado con todo respecto e admiración, por iso facemos propostas que beneficien e recoñezan  a figura da muller.

  Non imos a saír desa liña posto que estamos convencidos de que unha sociedade non logrará progresar nunca mentres unha soa muller sufra calquera tipo de discriminación polo seu xénero.