Noticias
Blog
Casimiro Campo consegue que a Xunta invista en Maside 4 millóns de euros para erradicar o chavolismo
Maside, 3 de decembro de 2010.- As xestións ante a Xunta de Galicia do actual portavoz do PP en Maside e candidato popular á Alcaldía do municipio nas eleccións de 2011, Casimiro Campo, veñen de lograr o maior investimento en materia de vivenda social na historia deste concello: 4,2 millóns de euros, que a Xunta vai destinar á construción de vivendas para erradicar o chabolismo. Ditas vivendas serán cedidas en réxime de alugueiro ás familias que habitan o poboado chabolista de Fontela.
Este logro que Casimiro Campo ven de conseguir, coa mediación do presidente provincial do PP, Manuel Baltar, ante a Consellería de Medio Ambiente, Territorio e Infraestruturas, fará posible que o Instituto Galego da Vivenda e Solo invista un total de 4.230.046,40 euros na erradicación do chabolismo no Concello de Maside, tal como establece a addenda ao convenio asinado entre o IGVS e o Concello que foi aprobado onte polo Consello da Xunta de Galicia.
O convenio entre o IGVS e Maside establece que a administración autonómica construirá 25 vivendas que pasarán a propiedade municipal por importe do 2% do custo total da súa execución, fraccionado en cinco prazos anuais. As vivendas desenvolveranse en planta baixa e contarán cun rocho e un garaxe. Así mesmo cada vivenda contará cunha parcela que constituirá unha prolongación ao exterior do propio espazo da vivenda. Este convenio entre o IGVS e o concello de Maside ten vixencia ata o 30 de decembro de 2015.
Casimiro Campo afirma que todos "os que queremos o mellor para o Concello de Maside sentímonos felices deste importante investimento da Xunta no noso municipio. Pero non abonda: temos que seguir traballando con humildade e responsabilidade para tentar achegar a todos os nosos veciños as melloras que o noso concello necesita".
Pola súa banda, Manuel Baltar considera que proxectos como este "marcan a diferenza entre as xestións do Partido Popular e as do actual goberno local de Maside, caracterizado por levar un rumbo errático sen que nada se fixera nestes anos de goberno socialista no concello".