Manuel Baltar cualificou de "magnífica e exitosa" a primeira semana de campaña "polo entusiasmo que notamos na xente", e afirmou que tanto ou máis o vai ser a segunda semana, en concreto o vindeiro martes, coa visita a Ourense de Mariano Rajoy, "quen ven para asumir compromisos con Ourense e para estar cos ourensáns a pé de rúa, para escoitalos, para falar cos cidadáns, porque así é como se fai política, cun contacto total e directo coa xente, e non como fixeron Felipe González e Zapatero que se atrincheraron na Moncloa dándolle as costas á cidadanía".
A axenda de Mariano Rajoy en Ourense inclúe tamén unha visita á sede do PP, onde manterá un encontro cos membros da Xunta Directiva Provincial, cos que analizará as estratexias e os proxectos que os populares teñen para os 92 concellos da provincia.
Manuel Baltar, quen compareceu para facer unha valoración da campaña acompañado dos cabezas de lista ao Congreso e ao Senado por Ourense, Celso Delgado e Carmen Leyte, dixo que "o Partido Popular segue poñendo o acento nas máis de 26.000 persoas que non teñen traballo en Ourense. Esa é a nosa principal preocupación e por iso estamos a explicar as solucións que o programa do PP propón para poñer fin a esa lacra social provocada pola nefasta xestión socialista", e engadiu: "Mentres Rubalcaba fala de Rajoy, o Partido Popular fala de España, dos problemas que ten, e dos proxectos que hai que poñer en marcha para solucionar os problemas de emprego, da economía e do benestar que ten o noso  país".
Baltar afirma que o PP "está a conectar máis ca nunca cos cidadáns, porque somos o partido da xente: pensamos como cada un dos cidadáns, como cada un dos pais, dos fillos, dos avós e dos xóvenes. Identificámonos con todos porque todos os españois sabemos que isto non pode seguir así, e o vindeiro día 20 ímolo cambiar entre todos, para que estes oito anos perdidos e cheos de tristura e ineficacia se convertan en ilusión por un futuro de benestar para as persoas e as empresas".
"O PP é o único partido que sae a gañar estas eleccións -explicou Baltar-: o BNG está desaparecido, e o PSOE, que anima ao bipartidismo, di que sae a empatar. Pois tal e como están as cousas, se algo necesita España nestes momento é valentía e firmeza, non políticos que, como non teñen programa, só fan preguntar polo programa dos demais. Así nos foi estes anos. Pero que non se preocupe o señor Rubalcaba que se non ten ideas nin proxecto pode fotocopiar o programa do PP para aprender cómo hai que facer as cousas polo ben da cidadanía".