Noticias
Blog
Primeira Interparlamentaria do PPdeOU co lema “#OrgullodoRural”: Os representantes institucionais do PP de Ourense comprometen a protección, defensa e promoción do mundo rural como garante do futuro do territorio
ppou - 26-Outubro-2024 - 13:01:39
 |
• Luis Menor explicou que para esta primeira Interparlamentaria escolleuse como eixo o mundo rural “porque falamos do 80 % da provincia, cun inmenso valor en todos os ámbitos, económico, cultural, social, medioambiental ou patrimonial, e por iso temos a obriga de preservar e contribuír a desenvolver este modelo de vida, de cultura e sabias tradicións”
• O portavoz do grupo popular no Parlamento de Galicia, Alberto Pazos, afirmou que falar do rural en Ourense impón, “porque son consciente do que representa para esta provincia”, avogando por atraer á mocidade cara o rural como garantía de futuro para este medio
• Patricia Torres, Miguel Ángel Viso, Celso Delgado e Manuel Baltar foron os encargados de falar en nome dos 27 compañeiros e compañeiras na Deputación, Parlamento de Galicia, Congreso e Senado, facendo énfase en cuestión como os servizos básicos, o financiamento dos concellos, a mobilización de terras, a seguridade, os fondos europeos ou as comunicacións terrestres e de conexión tecnolóxica
26, outubro, 2024. A sede provincial do Partido Popular de Ourense acolleu esta mañá a primeira Interparlamentaria que celebra o partido na provincia e na que participaron todos os representantes institucionais do PP na Deputación, no Parlamento de Galicia, Congreso e Senado, ademais da presenza do presidente provincial, Luis Menor; a secretaria xeral, Sandra Quintas; e o portavoz do PP na cámara galega, Alberto Pazos.
No encontro, baixo o lema “#OrgullodoRural”, os cargos electos populares comprometeron a protección, defensa e promoción do mundo rural como garante do futuro do territorio, ademais das áreas urbanas e metropolitanas que concentran, no caso de Ourense, a un de cada tres habitantes da provincia.
Luis Menor explicou que para esta primeira Interparlamentaria escolleuse como eixo o mundo rural “porque falamos do 80 % da provincia, cun inmenso valor en todos os ámbitos, económico, cultural, social, medioambiental ou patrimonial, e por iso temos a obriga de preservar e contribuír a desenvolver este modelo de vida, de cultura e sabias tradicións”.
O presidente provincial defendeu que o rural “estea sempre no noso vocabulario, porque ninguén mellor que o PP e os seus representantes coñece o potencial deste territorio, porque tamén só o Partido Popular está presente en cada recuncho da provincia”.
Reflexionou Luis Menor sobre este tipo de encontros, que figuraban no seu programa como presidente do partido e que terán carácter anual, centrándose de cada volta nos máis diversos asuntos de interese para a provincia. Así, cualificou as interparlamentarias como “ferramentas fundamentais para o intercambio de información, coordinación, reforzo do traballo e acción política dos nosos representantes nos ámbitos nacional, autonómico e provincial”. Só deste xeito o PP de Ourense “será quen de presentar iniciativas e recomendacións para demandar ou poñer en marcha respostas axeitadas ás necesidades do noso territorio e dos seus habitantes”.
ALBERTO PAZOS: “O ASENTAMENTO DA MOCIDADE NO NOSO RURAL SERÁ A MELLOR GARANTÍA PARA CONSEGUIR UN RURAL VIVO E CON FUTURO”
Alberto Pazos afirmou que falar do rural en Ourense impón, “porque son consciente do que o rural representa para esta provincia, tanto a nivel social, como económico”. Nesta liña defendeu a responsabilidade de parlamentarios ourensáns na Cámara galega “en portavocías estratéxicas relacionadas co mundo rural”, como Miguel Ángel Viso (coordinador de temas rurais); Juan Casares (área de viticultura); ou Cristina Campero (actividades forestais).
Pazos destacou a a aposta da Xunta polo rural galego, con políticas sociais e de emprego, ámbitos que supoñen 3 de cada 4 euros do orzamento para 2025 e que “tamén van a beneficiar especialmente a todos os galegos que residen en zonas rurais”.
Puxo tamén énfase nun dos asuntos que máis preocupa ao Goberno galego: a remuda xeracional no medio rural e a posta a disposición da mocidade de incentivos para que se animen a desenvolver a súa vida nestas zonas, abrindo liñas de axudas para favorecer a incorporación ao sector primario: “O asentamento de mozos e mozas no noso rural será a mellor garantía para conseguir un rural vivo e con futuro”.
PRINCIPAIS CONCLUSIÓNS:
Entre as principais conclusións e compromisos desta primeira Interparlamentaria, Patricia Torres, Miguel Ángel Viso, Celso Delgado e Manuel Baltar abordaron os seguintes temas:
• Vivir no rural e do rural.
Os representantes institucionais do Partido Popular de Ourense no Senado, Congreso, Parlamento galego e Deputación adquiren como absoluta prioridade a defensa dos intereses do medio rural na provincia de Ourense, con fin de contribuír ao desenvolvemento dun territorio dotado dos servizos básicos e de calidade necesarios para atraer e fixar poboación e facelo rendible económica e socialmente.
• Rural con futuro.
Avógase por un rural ben conectado, con comunicacións por estradas seguras e recuperando conexións e frecuencias por ferrocarril; protexendo aos autónomos e emprendedores; onde as políticas de reto demográfico sexan efectivas poñendo en valor especialmente o apoio activo á muller.
• Financiamento das entidades locais.
Os ingresos non aumentan, pero si medran os custos dos servizos que se prestan mentres se asumen máis competencias, afogando cada vez máis as economías municipais.
• Sector agrícola e gandeiro.
O sector primario ten un peso económico básico na economía provincial. Comprométese o impulso ás políticas estatais e comunitarias que incidan con carácter xeral no territorio, como a nova Política Agraria Común; un agro sustentable; soporte ao sistema de seguros agrarios; e a esixencia do remate do Plan de Regadío na Limia nas mellores condicións para os regantes.
• Mobilización de terras.
Hai que superar as dificultadas para identificar os propietarios de fincas, o que trae consigo unha carga administrativa engadida os concellos. A Lei de recuperación da terra agraria procura combater o abandono de terras e fomentar a produtividade.
• Seguridade da poboación.
Defendemos políticas e medidas estatais para garantir a seguridade no rural. Por iso expresamos o noso rexeitamento aos peches de cuarteis da Garda Civil e esiximos que se garanta a atención presencial aos cidadáns, mesmo o mantemento dos Xulgados de Paz.
• Turismo e patrimonio.
Compre preservar e promocionar o rico patrimonio cultural e natural da provincia. O termalismo é unha singularidade a fortalecer e a Ribeira Sacra un factor de desenvolvemento turístico a futuro, tendo en conta a candidatura a Patrimonio da Humanidade.
• Fondos europeos e áreas transfronteirizas.
A defensa do sector primario tamén pasa por esixir a chegada dos fondos europeos ao territorio, así como unha especial atención a outra realidade fundamental do noso rural: as áreas transfronteirizas.
• Telecomunicacións.
Se queremos ofrecer no rural servizos modernos e acordes aos avances tecnolóxicos é imprescindible a fibra óptica e a cobertura 5G, cada vez máis esencial para a vida cotiá pero básica para o emprendemento, empresas e empregos de base tecnolóxica.