Noticias
Blog
Eleccións Xerais 2019: Sostenibilidade económica das pensións e mellora do poder adquisitivo dos pensionistas, prioridades do PP
• Os candidatos ao Congreso e ao Senado reuníronse coa Asociación das Viúvas de Ourense para explicarlles as propostas do programa popular en materia de pensións e a necesidade dun pacto de Estado sobre dependencia.
10, abril, 2019.
Os candidatos do Partido Popular ao Congreso e ao Senado, Ana Vázquez, Celso Delgado, Avelino García, Miguel Ángel Viso e Francisco Fernández, visitaron a Asociación de Viúvas de Ourense, onde mantiveron un encontro coas asociadas para explicarlles as propostas que o PP presenta no seu programa electoral en materia de pensións.
“O cobro das pensións é un obxectivo absolutamente prioritario -dixo a candidata ao Congreso Ana Vázquez- polo que temos que manter a sostenibilidade económica e financeira do sistema, sen esquecer a mellora do poder adquisitivo dos pensionistas”. Citou neste sentido a Ley de Sostenibilidade das Pensións, “que entre outros aspectos recollería un complemento de ata o 15 % nas pensións das mulleres e garantiría unha suba anual do 0,26 %.
Advertiu Vázquez que “fronte ao goberno de Sánchez, que conxelou as pensións e agora quere baixar as de viudade, co executivo de Rajoy beneficiáronse 3.900 viúvas na provincia de Ourense cunha suba do 16 %”.
Tamén mencionou a candidata outros asuntos de interese para o colectivo, como a necesidade de deseñar unha lei básica de servizos sociais “que teña en conta os dereitos das persoas maiores, pero sobre todo un pacto de Estado que comprometa a todos coa vibilidade da dependencia”.
Ana Vázquez subliñou ante as asistentes a importancia do sistema de pensións de España como o pilar máis importante do Estado do Benestar, que dedica 4 de cada 10 euros ao pagamento de 9,6 millóns de pensións, “convertíndonos nun sistema solidario que nos axuda a situarnos como un dos países da OCDE con menor taxa de riesgo de pobreza entre os maiores de 65 anos, por diante de países como Alemania, Bélxica ou Austria”.