Noticias
Blog
O Partido Popular presentarase como acusación particular contra a presunta estafadora detida hoxe en Ourense
4, decembro, 2018.
O secretario xeral do Partido Popular de Ourense, Rosendo Fernández, anunciou esta tarde que a formación popular presentarase como acusación particular no caso da presunta estafadora detida pola Policía Nacional e que, segundo informou hoxe a Comisaría ourensá, dábase a coñecer como próxima a políticos con poder, mesmo mostrando documentos con membretes de partidos políticos, ofrecendo a súa intermediación para obter favores a cambio de diñeiro.
Rosendo Fernández expresou o seu máis absoluto rexeitamento aos feitos agora coñecidos e mostrouse tallante ao afirmar que “o Partido Popular sempre tomará as medidas máis contundentes que poña ao seu alcance a lei contra aquelas persoas que, en nome das nosas siglas, tenten perpetrar accións ilegais en beneficio propio”.
O secretario xeral, que lamentou os prexuízos ocasionados ás vítimas pola presunta estafadora, engadiu que os servizos xurídicos do PP poñeranse a traballar de inmediato para coñecer os detalles destes feitos “e deixar meridianamente claro que o noso partido é unha vítima máis da detida”.