Noticias
Blog
Eleccións locais 2019: O Partido Popular impulsa a renovación en Petín coa candidatura a alcaldía de Carlos Goñi
• O candidato popular di estar convencido de “ter a ilusión e as ganas suficientes para mover un concello no que as miñas prioridades son as persoas, as maiores para que teñan uns bos servizos e calidade de vida, e os mozos para garantir o futuro do municipio”.
• O presidente provincial, Manuel Baltar, afirmou que “a renovación de candidatos que estamos a impulsar ten, como premisa fundamental, contar con xente que conecte cos seus veciños, que mire ás persoas como o principal valor do seu concello e que teña capacidade para transformar o municipio”.
3, decembro, 2018.
Carlos Goñi Garrido (Pamplona, 1965) encabezará a lista do Partido Popular á alcaldía do concello valdeorrés de Petín, dentro do proceso de renovación que a formación popular emprendeu no ámbito municipal cara as eleccións de 2019. “Un paso meditado e cheo de responsabilidade –dixo- froito da pasividade que estaba a ver por parte dos actuais responsables municipais”.
Goñi Garrido, vencellado profesionalmente ao sector da construcción, trasladouse a Petín hai anos tanto por cuestións familiares como de traballo, afirmando que como “galego de adopción tamén ten inquedanzas e ganas de traballar polo lugar onde resido e teño a miña vida”.
O candidato popular á alcaldía de Petín di estar convencido de “ter a ilusión e as ganas suficientes para mover un concello no que as miñas prioridades son as persoas, pero de xeito especial os maiores e os mozos. Os primeiros para que teñan uns bos servizos e calidade de vida, e os segundos para garantir o futuro do municipio”.
Carlos Goñi, que recoñeceu o seu interese pola vida municipal, agradeceu a confianza depositada na súa persoa por parte do actual portavoz do PP en Petín, Manuel de la Fuente Díez, e a oportunidade que lle está a brindar o presidente provincial para “tentar dar un novo rumbo a Petín”.
A esa nova dirección referiuse precisamente Manuel Baltar, para quen “a renovación de candidatos que estamos a impulsar desde o partido ten, como premisa fundamental, contar con xente que conecte cos seus veciños, que mire ás persoas como o principal valor do seu concello e que teña capacidade de traballo para transformar o municipio”.
O presidente provincial valorou moi positivamente o paso dado por Carlos Goñi “pois demostra que o compromiso coa terra e as súas xentes non ven dado só polo lugar de nacemento, senón tamén polo compromiso co territorio no que estás a desenvolver o teu proxecto de vida”.