Noticias
Blog
Manuel Baltar: “O anuncio de hoxe amosa a grandeza, xenerosidade e vocación de servizo a España e ao PP de Rajoy”
ppou - 05-Xuño-2018 - 19:08:31
• “Os milleiros de militantes do partido na provincia e todos os representantes públicos populares temos a obriga de felicitar a Mariano Rajoy polo seu compromiso, implicación e militancia popular”, afirmou o presidente popular ourensán.
• Baltar lembrou que o presidente nacional sempre estivo apoiando ao Pp de Ourense, “protagonizando actos electorais, preocupándose sempre e felicitándose polos resultados, sendo un gran presidente, exemplo de tolerancia, de accesibilidade e de permanente servizo aos principios que defendemos no noso partido”.
5, xuño, 2018.
“O anuncio de hoxe é unha mostra máis da xenerosidade, grandeza e vocación de servizo a España e ao PP de Mariano Rajoy, pensando no interese xeral do seu país e do seu partido”, manifestou o presidente provincial do Partido Popular de Ourense, Manuel Baltar, logo de coñecer a decisión do líder popular de deixar a presidencia nacional do partido.
 |
En nome dos populares ourensáns, Baltar agradeceu a Mariano Rajoy todo o tempo que estivo na presidencia da formación política máis importante de España e no goberno da nación, así como a entrega amosada nestes oito anos nos que ambos os dous coincidiron exercendo a presidencia do partido a nivel nacional e provincial, sen esquecer a colaboración co goberno de España nos seis anos nos que Manuel Baltar leva como presidente do goberno provincial.
“Mariano Rajoy fixo que España recuperara a súa situación económica e credibilidade internacional, creado emprego e transitando con firmeza a senda da recuperación”, afirmou Baltar, para quen “os milleiros de militantes do partido na provincia e todos os representantes públicos populares temos a obriga de felicitar a Mariano Rajoy Brey polo seu compromiso, implicación e militancia popular”.
Mariano Rajoy, lembrou o presidente provincial, estivo sempre ao lado do Partido Popular de Ourense, “protagonizando actos electorais, apoiando, preocupándose sempre e felicitándose polos resultados, sendo un gran presidente, exemplo de tolerancia, de accesibilidade e de permanente servizo aos principios que defendemos no noso partido”. “Foi unha honra militar no Partido Popular baixo a presidencia de Mariano Rajoy e desde o PP ourensán desexámoslle todos os éxitos persoais e profesionais que o futuro lle ten reservados”, engadiu.
Manuel Baltar, diante do congreso extraordinario que agora haberá de convocar a xunta nacional do partido, asegurou que o PP ”aproveitará esta oportunidade para renovar equipos e proxecto, apostando sempre pola nosa vocación de servizo e utilidade á sociedade, a quen debemos servir e representar con dignidade”.