Noticias
Blog
O PP de Barbadás reclama mobiliario deportivo ao aire libre e un sistema de sinalización visual para persoas con discapacidade intelectual
ppou - 09-Maio-2017 - 12:57:37
• Propón instalar elementos estáticos e barras de estiramento preto das instalacións deportivas para incentivar o deporte de rúa.
• Pide que todos os edificios públicos teñan un sistema de pictogramas informativos que faciliten calquera xestión por parte de cidadáns con dificultades cognitivas.
Ourense, 7 de maio de 2017.- O grupo popular de Barbadás presentará no pleno do mes de maio dúas mocións para instar o Concello a implantar elementos deportivos ao aire libre, así como a estudar a posibilidade de implantar sinalización visual para persoas con discapacidade intelectual nos edificios oficiais.
Desde o PP de Barbadás proponse a instalación de mobiliario deportivo para realizar exercicios de estiramento e quecemento fronte ao polideportivo e preto das piscinas. A intención final é estender esta dotación deportiva a máis lugares da Valenzá onde se constate a práctica de exercicio ao aire libre. O material deportivo consistiría en barras e elementos estáticos que permitan realizar exercicios de quecemento, estiramento, exercicios de fondo ou flexións.
A proposta popular tamén convida o grupo de goberno a poñer en marcha a campaña “Lecer saudable con deporte na rúa” para informar os veciños sobre o funcionamento deste equipamento, así como incentivar a práctica da ximnasia deportiva de rúa entre maiores, mozos e colectivos desfavorecidos.
Desde o Partido Popular de Barbadás se aposta por fomentar o deporte e os hábitos saudables entre a vecinanza “sen que supoña grandes custos persoais”.
Para que a proposta tampouco teña un custo importante para o Concello, a voceira popular, Consuelo Vispo, propón ao alcalde a procura de subvencións a través dos servizos municipais para custear o investimento inicial.
Por outra banda, o PP de Barbadás propoñerá que os edificios oficiais conten con sinalización a base de pictogramas, para orientar a persoas con especiais dificultades cognitivas ou con discapacidade intelectual.
A moción propón crear unha mesa de traballo que estaría aberta a todos os grupos políticos, asociacións, colectivos e profesionais interesados en participar. Este órgano sería o encargado de propoñer un calendario de actuación e implantación deste sistema.
O PP tamén reclama ao grupo de goberno diálogo e coordinación co resto de organismos oficiais con presenza en Barbadás, para que implanten nos seus locais as sinais aprobadas polo Concello.