Noticias
Blog
Novas Xeracións homenaxea a Ramón Otero Pedrayo no aniversario do seu pasamento
ppou - 08-Abril-2017 - 14:03:28
• No pazo museo do patriarca das letras galegas, o coordinador de Política Autonómica do PP, Miguel Santalices, destacou que actos como este “honra a persoas que fixeron tanto pola nosa cultura e pola nosa lingua, mantendo vivo o seu soño dunha Galicia que fose unha autonomía para nos poder gobernar”.
Ourense, 8 de abril de 2017.- A organización xuvenil do Partido Popular, Novas Xeracións, celebrou hoxe unha homenaxe ao patriarca das letras galegas, Ramón Otero Pedrayo, cando está a piques de se cumprir o corenta e un aniversario do seu pasamento, ocorrido o 10 de abril de 1976. O acto tivo lugar no Pazo Museo ubicado en Cimadevila, na parroquia de Trasalba (Amoeiro), onde se garda a memoria do escritor, profesor e político ourensán e alí se deron cita os membros de Novas Xeracións, co seu presidente provincial José Antonio Parente, acompañado polo coordinador de Política Autonómica do PP, Miguel Santalices.
 |
No exterior da casa, os asistentes leron varias pasaxes das principais obras de Otero Pedrayo, como Os camiños da vida, onde fala da sociedade decimonónica galega e da fin da sociedade hidalga; Arredor de si, para destacar a conciencia da nación galega e da ourensanía do autor; e un texto do artigo publicado no periódico El Heraldo Gallego, no que Otero Pedrayo repasaba a súa infancia en Trasalba.
No programa do acto figuraban as intervencións de José Antonio Parente e Miguel Santalices. José Antonio Parente destacou a faceta historiadora do intelectual ourensán, “que sempre levou a Ourense aló das nosas fronteiras”, ademais de poñer o énfase na súa actividade cultural, sinalando neste sentido que o seu traballo “é un exemplo para os mozos de Novas Xeracións, que estamos a reivindicar permanentemente a nosa cultura e aos máximos expoñentes da ourensanía”.
Miguel Santalices, pola súa banda, felicitou aos mozos de Novas Xeracións por unha iniciativa “que defende o sentimento que compartía Otero Pedrayo e co que se honra a persoas que fixeron tanto pola nosa cultura e pola nosa lingua, mantendo vivo o espírito dos nosos antepasados, que sempre soñaron cunha Galicia que fose unha autonomía para nos poder gobernar”.