Noticias
Blog
O grupo popular pedirá no próximo pleno da Deputación que Fomento continúe nesta lexislatura o proxecto da variante exterior do AVE
• Os populares lembran nunha moción rexistrada esta mesma mañá os sucesivos compromisos asumidos polo Goberno durante a xestión de Ana Pastor ao frente do ministerio.
• A chegada da alta velocidade, afirma o grupo do PP, é unha oportunidade para incrementar a competitividade de Ourense e maila provincia polo que pide a execución do tramo Taboadela-estación Empalme sen variación algunha.
Ourense, 13 de decembro de 2016.- O grupo popular pedirá o apoio da corporación provincial no próximo pleno da Deputación para instar ao Ministerio de Fomento a que, en coherencia con todos os pasos administrativos dados, “proceda nesta lexislatura a continuar avanzando na execución da proxectada variante ferroviaria entre Taboadela e Ourense”.
Así consta na moción rexistrada hoxe polo grupo popular, en resposta ás manifestacións do ministro de Fomento, Íñigo de la Serna, nas que cuestionou o proxecto da coñecida como variante exterior do AVE, poñendo en dúbida o investimento de 600 millóns de euros para o tramo de 17,9 quilómetros correspondente ao tramo entre Tabodela e a estación Empalme.
A moción, que inclúe como proposta o trasalado do acordo do pleno aos presidentes do Goberno español e da Xunta de Galicia, recolle en detalle os pasos dados e as declaración feitas pola anterior titular de Fomento, Ana Pastor, que en todo momento comprometeu a construcción desta variante.
Así, cítase a presentación en abril de 2013 e por parte da entón ministra do novo proxecto de integración ferroviaria na capital, onde se confirmou “a variante proxectada como a solución máis axeitada para a chegada da alta velocidade á cidade”.
Un compromiso que Ana Pastor reiterou o 22 de xuño deste mesmo ano, afirmando que o mencionado tramo era “unha solución optimizada, sustentable e funcional (…) consensuada con todas as administracións”. Logo de facer un repaso polas fases xa cumpridas do proxecto, incluídas as recentes resolucións de impacto ambiental, o grupo provincial popular lembra que o proceso administrativo e ambiental da variante avanzou “dun xeito lento, pero decidido dende 2013 ata novembro deste ano”.
Ademais, o propio pleno da Deputación, lémbrase na presente moción, aprobou no recente debate sobre o estado da provincia unha proposta de resolución para a execución de todas as actuacións previstas, “para que a chegada da alta velocidade sexa unha realidade cumprindo os prazos establecidos”.
Para os populares, a chegada da alta velocidade é un fito histórico non só para a capital, senón tamén para o conxunto da provincia, unha oportunidade para ser un territorio máis competitivo, polo que non desexan nin variacións nin renunciarán ao proxecto inicial.