Noticias
Blog
O grupo provincial popular presenta un decálogo de propostas para o pleno extraordinario do debate sobre o estado da provincia
ppou - 10-Novembro-2016 - 10:34:25
• Para o vicepresidente primeiro, Rosendo Fernández, o documento recolle aspectos estratéxicos para o futuro desta provincia, “pero que tamén abranguen unha completa representación de todas as actividades que desenvolve a institución provincial”.
• As propostas van dende a creación dunha Zona Franca de Ourense ata unha feira anual con todas as denominación de orixe de viño da provincia ou unha especial atención á figura de Carlos Casares, a quen estará adicado o Día das Letras Galegas 2017.
Ourense, 10 de novembro de 2016.- Dinamización económica, emprego e emprendemento, medio rural, termalismo, viticultura, cooperación cos concellos, cultura e patrimonio e igualdade son os ámbitos aos que se refiren as dez propostas de resolución que o grupo provincial popular presentará no pleno extraordinario do debate sobre o estado da provincia, que a Deputación de Ourense celebrará o próximo mércores, día 16.
Un decálogo que “recolle aspectos estratéxicos para o futuro desta provincia, pero que tamén abranguen unha completa representación de todas as actividades que desenvolve a institución provincial”, dixo o vicepresidente primeiro, Rosendo Fernández, que na presentación do documento estivo acompañado polos deputados Pablo Pérez, Plácido Álvarez e Ana Villarino.
Rosendo Fernández, que apuntou que o PP era o primeiro partido en presentar as súas propostas, destacou as proposicións referidas á viticultura, “coa celebración dunha feria-exposición anual na que estarían presentes todas as denominacións de orixe da provincia”, e o termalismo, “ámbito no que se quere impulsar un completo sistema de información sobre as propiedades terapéuticas das augas mineromedicinais, en concordancia coa aposta polo turismo de saúde”, explicou.
A dinamización económica “é unha cuestión básica para o futuro de Ourense que non pode quedar fora, baixo ningún concepto, deste documento de propostas”, apuntou o deputado popular ao referirse á liña de actuación que avoga por promover a creación dunha Zona Franca para Ourense, que se concentraría no polo industrial existente en torno ao polígono de San Cibrao e a Tecnópole. Tamén no ámbito económico se recolle a colaboración activa co Viveiro de Empresas e as Antenas Locais de Verín e O Barco que xestiona a Cámara de Comercio, co fin de potenciar o emprendemento e axudar á creación de emprego.
“O medio rural é unha das principais bazas coas que contamos na provincia á hora de falar de oportunidades e potencial, e por iso imos propoñer unha liña de actuación específica para os montes veciñais en man común”, apuntou Rosendo Fernández, explicando que se trata de ofrecer asesoramento para a constitución e xestión destas entidades, con especial atención á posta en marcha de proxectos que xeren riqueza e emprego no rural.
Como institución provincial, “a cooperación cos concellos é a pedra angular da Deputación”, sinalou Fernández á hora de se referir as proposicións dunha asistencia específica para elaboar relacións de postos de traballo por parte das entidades locais, así como tamén inventarios de bens municipais. A este punto se suma o pulo á calidade dos servizos públicos con enquisas de avaliación que permitan afondar na transparencia da xestión e na permanente mellora”.
No ámbito da cultura, o grupo provincial popular entende que a celebración do Día das Letras Galegas 2017, que estará adicado a Carlos Casares, é merecente dunha programación especial para poñer en valor a figura e a obra do escritor limián, que mesmo podería incluír un premio co seu nome. “Unha ocasión moi especial para reivindicar a Ourense como terra de escritores e intelectuais esenciais na historia de Galicia”, dixo Rosendo Fernández. O complemento neste capítulo chega da man da proposta de constitución dunha comisión provincial de patrimonio, que se encargaría de estudar medidas de rehabilitación, conservación e difusión.
Por último, o decálogo de propostas inclúe a redacción dun plan de igualdade para a Deputación.
PROPOSTAS DE RESOLUCIÓN
1.- LIÑA DE ACTUACIÓN: SECTOR VITIVINÍCOLA
“Poñer en marcha, en colaboración cos consellos reguladores das denominacións de orixe Ribeiro, Valdeorras, Monterrei e Ribeira Sacra, unha feira/exposición anual do viño da nosa provincia”.
2.- LIÑA DE ACTUACIÓN: COOPERACIÓN COS CONCELLOS
“Prestar asistencia específica ás entidades locais da nosa provincia na elaboración das relacións de postos de traballo e no inventario de bens municipais”.
3.- LIÑA DE ACTUACIÓN: CALIDADE DOS SERVIZOS PÚBLICOS LOCAIS
“Avaliar mediante as enquisas correspondentes os servizos públicos prestados polos entes locais da provincia de Ourense, afondando na transparencia da xestión e na mellora permanente”.
4.- LIÑA DE ACTUACIÓN: ECONOMÍA, EMPREGO E EMPRENDEMENTO
“Colaborar activamente coa Cámara de Comercio e Industria de Ourense para potenciar o papel do Viveiro de Empresas co que conta na Tecnópole e as Antenas Locais de Verín e do Barco de Valdeorras”.
5.- LIÑA DE ACTUACIÓN: TERMALISMO
“Establecer, tendo en conta as recomendacións dos colexios profesionais da saúde, un sistema integral de información terapéutica das principais augas mineromedicinais da provincia”.
6.- LIÑA DE ACTUACIÓN: IGUALDADE
“Elaborar, tendo en conta os postulados e a filosofía do Código Ético e de Conduta, un Plan de Igualdade propio da Deputación de Ourense”.
7.- LIÑA DE ACTUACIÓN: CULTURA E PATRIMONIO
“Constituír unha comisión provincial do patrimonio cultural que estudie e se pronuncie respecto da súa rehabilitación, conservación e difusión, propoñendo as medidas que estime oportunas ante as administracións públicas e entidades correspondentes”.
8.- LIÑA DE ACTUACIÓN: MONTES VECIÑAIS EN MAN COMÚN
“Axudar e asesorar ás comunidades propietarias de montes veciñais en man común para a legalización da súa xestión no correspondente a estatutos, elección de xuntas reitoras e consulta das axudas públicas e posta en marcha de proxectos que xeren riqueza e emprego no rural”.
9.- LIÑA DE ACTUACIÓN: DÍA DAS LETRAS GALEGAS 2017
“Desenvolver durante o ano 2017, tendo en conta que o Día das Letras Galegas adicarase a Carlos Casares, referente literario provincial, actos e manifestacións en lembranza da súa figura e da súa obra, de común acordo coa Fundación Carlos Casares, estudando a posibilidade de instaurar un premio cultural que leve o seu nome”.
10.- LIÑA DE ACTUACIÓN: SOLO EMPRESARIAL E DINAMIZACIÓN ECONÓMICA
“Estudiar, con outras administracións públicas, a posibilidade de promover a constitución da Zona Franca de Ourense, tendo en conta o solo industrial-comercial que se concentra na área onde se atopan o Polígono de San Cibrao das Viñas, a Tecnópole, o Polígono de Barreiros, a Cidade do Transporte e os parques empresariais de Pereiro de Aguiar, de Paderne de Allariz e de Taboadela (8.650.000 metros cuadrados) gañando en capacidade autónoma e decisoria empresarial e en competitividade”.