Noticias
Blog
“Aínda queda lonxe o noso teito electoral e ímolo demostrar en próximas citas coas urnas, afirma Manuel Baltar ante a xunta directiva do PP
ppou - 28-Septembro-2016 - 20:07:47
• En xuño, lembrou o presidente provincial, “xa diciamos que había posibilidades de mellora”, o que quedou demostrado co aumento de apoio ao partido e a victoria en 88 concellos”.
• Extrapolando os datos, o PP obtería 83 maiorías absolutas na provincia, pasaría de 14 a 19 deputados provinciais e consolidaría os representantes nacionais.
• Baltar emplazou aos membros do órgano de dirección a seguir traballando coa vista posta nas municipais de 2019 “para conseguir máis alcaldías” pero advertindo a posibilidade de novas eleccións xerais en decembro.
Ourense, 28 de setembro de 2016.- “O Partido Popular de Ourense amosou o domingo que aínda queda lonxe o seu teito electoral e ímolo demostrar nas seguintes citas coas urnas”, afirmou esta tarde o presidente provincial popular, Manuel Baltar, no decurso da xunta directiva que, como xa é habitual logo duns comicios, o PP ourensán celebrou para analizar polo miúdo os resultados electorais.
As primeiras palabras de Manuel Baltar foron para os 92.418 ourensáns que confiaron o seu voto ao Partido Popular, “porque este é un trunfo para Ourense e os ourensáns, que apostaron clara e maioritariamente por catro anos máis de progreso cun goberno estable na Xunta”. Un resultado que para o presidente provincial só se pode alcanzar “cando se traballa sen descanso, haxa ou non eleccións, cunha campaña limpa, en positivo, chegando a todas as comarcas da provincia e falando de preto cos nosos veciños”.
Manuel Baltar lembrou que hai tres meses, logo das xerais de xuño, “xa dicíamos que había posibilidades de mellora e hoxe demostramos que estabamos a falar cargados de razóns, tantas como os case que 2.400 ourensáns (2.392) máis que con respecto ás autonómicas de 2012 decidiron agora darnos a súa confianza”.
Un incremento no número de votantes que se traduce en preto de catro puntos máis (3,94 %) de apoio porcentual ao PP, ata alcanzar o 53,11 %, o máis elevado de toda Galicia e que consolida a tendencia ascendente que marcaron as eleccións municipais de 2015. A explicación, dixo Baltar, radica nunha formación “que se marca obxectivos precisos, como desta volta consolidar os oito parlamentarios que tiñamos, sen deixar de aspirar ao noveno, e alcanzar o 50 % de apoio ou mesmo superalo como así foi”.
Sen deixar de destacar a elevada participación na provincia (66,12 %), “a maior de Galicia que aínda lexitima máis se cabe esta victoria”, Baltar presentou ante a xunta directiva o xa tradicional “mapa azul” da provincia, onde con total claridade se observa que o PP gañou en 88 dos 92 concellos, catro máis que nas anteriores autonómicas e un máis que nas pasadas xerais. En xuño, apuntou, “non desbotábamos posibilidades de gañar en algún dos cinco concellos onde o PP, por moi poucos votos, non acadou a maioría”. En dous deses municipios, Petín e Carballeda de Avia, alcanzouse o obxectivo.
Os datos son contundentes, afirmou o presidente provincial diante dos membros da xunta directiva, explicando que en 75 concellos se alcanzou máis do 50 % do apoio, máis do 60 % en 51 municipios e máis do 70 % en quince, subliñando os casos de Avión, Beariz e Quintela de Leirado, onde se superou o 80 %.
A importancia destes resultados, indicou Manuel Baltar, tamén hai que buscala na extrapolación dos datos, que outorgarían 83 maiorías absolutas ao PP na provincia, cinco representantes máis na corporación provincial pasando dos actuais 14 deputados a 19 e consolidaría a representación no Congreso e no Senado, con tres membros en cada unha das cámaras.
Con este escenario, Baltar xa puxo tarefas aos membros do órgano de dirección ao afirmar que “dende este instante temos que poñernos a traballar para conseguir máis alcaldías no 2019”, sen deixar de advertir que aínda pode haber unha terceira convocatoria nacional de eleccións “polo que o dinamismo que nos caracteriza témolo que converter nunha mensaxe para o resto de España de como se deben facer as cousas”.