Noticias
Blog
A Xunta Electoral ordena a retirada inmediata de pancartas do PSOE en Ramirás pedindo o voto e abre un expendiente
• A resolución parte dunha denuncia do Partido Popular de Ourense por vulnerar a lei electoral, que prohibe a difusión de publicidade ou propaganda electoral , que só pode realizarse nos quince días estrictos da campaña.
• Os populares expresan o seu máis absoluto rexeitamento ao continuo desprezo que os socialistas están a facer da lei electoral, e polo tanto do xogo democrático, con antecedentes nas xerais de xuño polas que foi sancionado o alcalde de Ribadavia, Ignacio Gómez.
Ourense, 2 de setembro de 2016.- A Xunta Electoral de Ourense ordenou hoxe a retirada inmediata das pancartas colocadas polo partido socialista en Ramirás, nos lugares de O Pambre, O Picouto e O Viso, co lema “VOTA PSOE”, así como abrir un expediente sancionador. A resolución parte da denuncia presentada onte polo Partido Popular de Ourense contra o PSdeG-PSOE de Ramirás, na persoa da súa responsable local, Isabel Gil Álvarez, tras comprobar a presenza dos citados soportes “o que supón unha evidente vulneración da lei electoral que prohibe calquera tipo de publicidade ou propaganda fora dos quince días estrictos de campaña”.
A denuncia do PP indica que a día 1 de setembro, oito días antes do inicio da campaña, estaban instaladas nos mencionados lugares pancartas nas que se pedía de modo directo o voto (achéganse imaxes), polo que “estamos ante unha actividade de difusión de publicidade ou propaganda electoral en data prohibida”, ata o inicio da campaña.
O PP subliña que se están a infrinxir os artigos 51 e 53 da lei electoral. O primeiro deles en tanto que sinala que “a campaña electoral comeza o día trixésimo octavo posterior á convocatoria”, que desta volta se corresponde coas 00.00 horas do venres día 9 de setembro. O segundo dos artigos deixa claro que “dende a convocatoria das eleccións ata o inicio legal da campaña queda prohibida a realización de publicidade ou propaganda electoral mediante carteis ou soportes comerciais”.
O Partido Popular destaca que a Xunta Electoral Central xa se pronunciou no seu momento sobre este tipo de situacións, indicando que a publicidade debe ser inmediatamente retirada “sendo en todo caso responsable o candidato ou formación política á que se refira a propaganda”.
Na súa denuncia, o PP reclamaba a imposición da sanción prevista no artigo 153.1 da lei electoral, na que se establecen multas de 300 a 3.000 euros se se trata de autoridades ou funcionarios e de 100 a 1.000 euros no caso de particulares.
O Partido Popular expresa o seu máis absoluto rexeitamento ao continuo desprezo que os socialistas están a facer da lei electoral, e polo tanto do xogo democrático, como así queda acreditado na recente sanción imposta a Ignacio Gómez, alcalde de Ribadavia, e o seu concelleiro de Facenda, Javier Iglesias, por presentar proxectos en pleno periodo electoral.
Recurso ante o Tribunal Constitucional
O Partido Popular decidiu, por outra banda, interpoñer un recurso de amparo diante do Tribunal Constitucional logo de que o xulgado do Contencioso-Administrativo número 1 de Ourense desestimase hoxe un recurso contra o acordo do 29 de agosto da Xunta Electoral Provincial, no que proclamaba a lista de candidatos de En Marea por Ourense para as eleccións autonómicas.
Para o Partido Popular, este acordo aceptou erróneamente a candidatura de David Rodríguez, como número dous da lista, cando incurría nunha patente causa de inelexibilidade. Segundo o recurso do PP, nin cando se presentou a lista de En Marea na Xunta Electoral para a súa proclamación nin cando rematou o prazo de subsanación de deficiencias se producira o necesario acordo do pleno municipal de toma de coñecemento da renuncia, acordo sen o que non é efectiva.
Aínda máis, cando o 22 de agosto este partido presentou na Xunta Electoral a lista de candidatos achegouse unha declaración xurada na que David Rodríguez aseguraba non estar incurso en causa de inelexibilidade.