Noticias
Blog
O PP de Paderne, primeiro de Ourense en presentar a candidatura para as eleccións Municipais de 2011
O Partido Popular de Paderne de Allariz foi a primeira formación política da provincia de Ourense en presentar a candidatura completa coa que concorrirá ás eleccións municipais de 2011. O cabeza de lista e actual alcalde de Paderne, José Manuel Fernández, dixo hoxe no acto de presentación ante uns 200 veciños: “O noso equipo non son só estes 19 nomes da lista, senón que son os centos de veciñas e veciños dos pobos do noso concello que queren o mellor para que este municipio siga crecendo e progresando”. O acto contou coa presenza do presidente provincial do PP, Manuel Baltar; membros do comité executivo provincial; o voceiro do PPdeG, Antonio Rodríguez Miranda, Jesús Vázquez, ademais de alcaldes e concelleiros populares da contorna.
“Quixemos presentar a lista da candidatura –engadiu José Manuel Fernández- porque queremos ser tamén os primeiros en poñernos a traballar polo obxectivo de acadar novamente a Alcaldía de Paderne en maio de 2011. Queremos que o labor que vimos desenvolvendo nestes anos siga dando froitos que permitan levar a cabo novos proxectos polo benestar de todos”.
Férnandez destacou que ao longo desta lexislatura fixéronse investimentos nos 44 núcleos de poboación e creáronse máis de 130 postos de traballo. Asemade, fixo un balance das obras e servizos que se puxeron en marcha, tanto no que atinxe a obras de medio ambiente e infraestruturas como as relacionadas coas novas tecnoloxías, e afirmou que agora o obxectivo está posto no parque empresarial, no fogar de maiores, na ampliación da rede de transporte metropolitano, para que poida chegar tamén a Paderne, e anunciou que en xaneiro está prevista cerrar a compra de 6.000 m2 de terreo para a construción do novo centro médico.
O acto de presentación da candidatura abriuno a representante de Novas Xeracións Diana Pérez Fernández, quen agradeceu a José Manuel Fernández o traballo desenvolvido ao longo destes anos “tanto a prol da xuventude como da xente maior, pois ten potenciado iniciativas nos eidos cultural, deportivo e de servizos sociais que lle deron ao noso concello un pulo importante na atención dos maiores e na realización de actividades destinadas á mocidade”.
O presidente provincial do PP, Manuel Baltar, pechou o acto destacando “a inmensa confianza” que os veciños de Paderne teñen depositado no seu alcalde e dende hoxe candidato ás eleccións de 2011. “Estou convencido de que José Manuel xunto co seu equipo saberán administrar, como xa o veñen facendo, ese gran caudal de apoio dos cidadáns de Paderne, para convertelo novamente no triunfo do partido máis importante e que máis apoios recibe sempre dos veciños: o Partido Popular”. Baltar dixo que o feito de ser o primeiro candidato que presenta a lista completa con tanta antelación “deixa ben ás claras o perfecto traballo organizativo e a gran ilusión que a xente ten depositada no proxecto do Partido Popular, algo que non é froito da impovisación: aquí hai equipo, hai ideas, hai proxecto e non hai dúbidas”.
Integrantes da candidatura