Noticias
Blog
A Valdeora do Pobo referenda a legalidade da limitación de acceso do público aos plenos da Deputación
ppou - 26-Xaneiro-2016 - 13:38:41
• O vicepresidente segundo, Jorge Pumar, subliña que o PP tomou a iniciativa de propoñer un regulamento para a presenza do público nas sesións, "fronte á pasividade da oposición".
Ourense, 26 de xaneiro de 2016.- “A decisión adoptada polo presidente da Deputación de limitar o acceso do público á sesión do 27 de novembro de 2015 non infrinxe o ordenamento xurídico local vixente”. Así conclúe a Valedora do Pobo, Milagros Otero Parga, o expediente aberto tras a queixa presentada polo grupo socialista da oposición. Un informe que para o vicepresidente segundo da institución, Jorge Pumar, supón todo un aval para a decisión adoptada no seu momento polo presidente, Manuel Baltar, “quen ten a responsabilidade de permitir o normal desenvolvemento das sesións”.
A conclusión da Valedora do Pobo prodúcese tras o estudo “global e razoado” da documentación achegada pola Deputación, logo da apertura do expediente en decembro pasado.
O mesmo informe aconsella, por outra banda, establecer “un procedemento obxectivo” para o acceso do público aos plenos, regulamento no que xa traballa o grupo de goberno do Partido Popular, subliñou Jorge Pumar, tras a moción presentada respecto diso polos populares no último pleno do pasado ano.
O grupo de goberno, sinala Jorge Pumar, “tomou a iniciativa neste tema e onte mesmo reunímonos cos portavoces dos grupos políticos da oposición e o Partido Popular foi o único que presentou unha proposta”.
Para o vicepresidente segundo da Deputación, “a pasividade mostrada por PSOE e BNG neste tema é unha mostra máis da súa estratexia de confrontación, na que non fan achega algunha e limítanse a tensar os plenos e denunciar ante a opinión pública supostas prácticas que, segundo din, coartan a liberdade de expresión”.
Unha declaración que, destaca Jorge Pumar, agora desmonta a Valedora do Pobo referendando a legalidade da decisión do presidente da institución provincial.
A Deputación de Ourense, conclúe, toma así a iniciativa incluso no conxunto das outras tres institucións provinciais de Galicia –gobernadas polo PSOE e por coalicións co BNG- e mesmo da nosa provincia, onde a práctica totalidade dos concellos carecen de normas específicas dentro dos seus regulamentos.