Nace, pois, por e para o galego,  para e por Galicia, coa pretensión de normalizar o uso do idioma, impulsalo e elevalo aos usos culturais; e ata a publicidade, deciden, deberá ser maioritariamente en galego e implicar así tamén á empresa e ao comercio, buscando contribuír á modernización de Galicia e facelo, por que non, na lingua propia.

Deciden que Ourense será o centro, o punto de referencia: a sede. O director, Vicente Risco; o responsable do financiamento, Arturo Noguerol; a impresión, La Región..., e así o primeiro número sae ese día, 20 de outubro de 1920, e co título de "Primeiras verbas" e "pra ledicia de todos, sae hoxe Nós".

Aqueles persoeiros foron uns adiantados e valentes, plurais, exemplares no facer e ben facer por Galicia, abertos, traballadores incansables, que atraían a moitos colaboradores, galegos, portugueses.. e outros que fixeron de Nós unha empresa a prol de Galicia inmensa e intensa. Nomes como Otero Pedrayo, Ánxel Fole, Pimentel, Emilio Pita, Luís Tobío, Teixeira de Pascoaes...

É pois, hoxe, noventa anos despois, que desde o Partido Popular de Ourense queremos sumarnos ás celebracións que por tal feito se fan, especialmente en Ourense, e sentírmonos ledos e comprometidos para seguir na liña e no espírito da Revista Nós,  dos seus creadores, e traballar, en colaboración plural e abertos, tamén con eses vínculos atlánticos, coas culturas e pobos de Portugal, de Hispanoamérica, ou coas demais culturas e rexións de España e Europa, para seguir facendo unha Galicia cada día mellor.

Seguir mantendo na memoria dos ourensáns, e galegos, feitos tan trascendentais como o da creación da Revista Nós e manter viva a obra de Risco, de Otero Pedrayo, de Cuevilas, de Losada Diéguez e de tantos outros bos e xenerosos galegos con Galicia.

Que esa pegada imborrable na nosa historia siga dándonos azos para continuar dignificando a lingua, a cultura e  Galicia, que aportemos ideas e traballo para poder sentírmonos orgullosos de sermos Nós e o interese supremo posto en Galicia.

Desde o PP de Ourense manifestamos ese compromiso cunha Galicia moderna, culta, plural e cada día mellor. Nós si estaremos por dignificar a realidade galega. Vaia, pois,  o noso orgullo e satisfacción e as nosas grazas a todos os que a crearon e a fixeron posible".